Очај помешан со гнев поради корупцијата завладеа со Кочани во вторникот, по пожарот во ноќен клуб што однесе десетици животи и остави многу други повредени, поттикнувајќи барања за правда.
Според АФП, неколку стотици луѓе се собраа во центарот на градот доцна во вторникот, додека неколку свештеници апелираа за „смиреност и мир“ обраќајќи им се на присутните, еден ден по инцидентите кога некои демонстранти оштетија друг објект на сопственикот на клубот.
Неколку стотици граѓани се собраа и на плоштадот во главниот град Скопје, како и во неколку други места низ земјата, осудувајќи ја корупцијата и барајќи одговорност за трагедијата.
Кочани, град со само 30.000 жители, е длабоко погоден од смртта на 59 лица — повеќето од нив тинејџери и млади — што допре речиси до секој дом, засекувајќи длабоко во ткивото на локалната заедница.
„Ние сме мал град. Сите се знаеме меѓусебно“, изјави за АФП Сашко Јорданов, 38-годишен стоматолог од Кочани. „Јас сум доктор и имам многу пациенти што загинаа, деца на пријатели и соседи.“
„Имам деца — нивни пријатели загинаа. Ова е ужасно,“ рече една жена додека палеше свеќи на импровизираниот споменик, каде што другите оставија цвеќе и пораки со сочувство.
Пожарот брзо се проширил додека маса млади фанови биле собрани во „Клуб Пулс“ за настап на популарниот хип-хоп бенд ДНК. Пламените јазици настанале откако огномет на сцената го запалил таванот на клубот.
Повеќе од 500 луѓе биле нагмечени внатре, иако биле продадени само 250 билети, според официјални лица. Многумина од загинатите биле прегазени додека се обидувале да стигнат до излезите, додека пламенот го проголтувал покривот.
Обвинителството соопшти дека клубот прекршил бројни противпожарни прописи, вклучувајќи недоволен број противпожарни апарати и излези за итни случаи. Министерот за внатрешни работи Панче Тосковски изјави дека сопственикот на клубот работел со фалсификувана лиценца и вети засилена борба против корупцијата.
На прес-конференција во вторникот, Тосковски најави дека локалната полиција во Виница и Штип ќе биде заменета со службеници од Скопје за да се обезбеди непристрасноста на истрагата.
„Оваа одлука не имплицира никаква вина, туку претставува чекор за гарантирање дека процесот ќе се одвива без притисоци, сомнежи или непотребни влијанија“, рече тој.
Тошковски истакна дека сите жртви се идентификувани, додека 16 осомничени се во притвор, а истражителите испитале 72 сведоци. Од пожарот биле повредени 196 лица, меѓу кои и 20 деца.
„Катастрофа“
Илјадници луѓе оддадоа почит низ цела Северна Македонија, држејќи минути молк за загинатите. Но, тажноста брзо се претвори во гнев, со демонстранти кои ја осудуваа државата.
„Ние што преживеавме во дискотеката, ако останеме тука, ќе умираме секој ден. Умираме од загаден воздух, умираме од корупција,“ изјави Венко Крстевски, кој тврди дека е преживеан од пожарот, обраќајќи им се на демонстрантите во Кочани. „Мораме да кажеме кој е одговорен, со име и презиме.“
Во понеделникот, демонстрантите излегоа на улиците на Кочани, додека други нападнаа кафе-бар, наводно во сопственост на истата личност како „Клуб Пулс“, фрлајќи камења и кршејќи прозорци додека полицијата се бореше да ја задржи контролата.
Во вторникот, премиерот Христијан Мицкоски изјави дека одговорот на трагедијата ќе биде брз.
„Како влада, правиме сè што можеме и ќе продолжиме да правиме сè што можеме за да спасиме човечки животи“, рече Мицкоски на прес-конференцијата.
Но, во Кочани, многумина дури сега започнуваат да ги собираат парчињата од своите скршени животи.
На гробиштата на периферијата од градот, работници копаа нови гробови за десетиците што загинаа во пожарот. Со крампови, лопати и багери, тие ги мереа парцелите со капак од ковчег, копајќи свеж ред на гробови под студено сиво небо.
За многумина, болката беше преголема за да се поднесе.
„Ова е ужасно. Имам братучетка — нејзиното дете загина,“ рече еден жител, кој работел близу „Клуб Пулс“ и побара да остане анонимен.
„Ова е голема катастрофа.“