Демократската унија за интеграција (ДУИ) го реафирмира својот принципиелен став за целосна, независна и непристрасна правда, ослободена од какви било политички влијанија, се наведува во соопштението на партијата.
„Трагедијата што се случи бара јасна институционална одговорност, без манипулации за политичка корист. За жал, сведоци сме на обиди на власта со сите средства да ги заштити своите и да ја одвлече јавноста со барање виновници на друго место“, стои во соопштението.
ДУИ оценува дека ваквиот селективен и неправеден пристап не само што го поткопува довербата на граѓаните во институциите, туку го загрозува и самиот процес на правда.
„Нема да паднеме во стапицата на политиката на обвинувања и поделби. За нас, правдата не може да се дели на ‘наши’ и ‘нивни’ — таа мора да биде еднаква за сите“, истакнува партијата.
ДУИ повикува институциите да останат надвор од секое влијание и да обезбедат транспарентен, непристрасен и праведен процес.
„Само вистината и целосната одговорност можат да ја вратат довербата на граѓаните. Секој обид за отстапување од овој процес не е во служба на правдата, туку во служба на оние што сакаат да ја сокријат вистината“, се вели во соопштението на ДУИ.