Основачот на платформата „Rumble“, Крис Павловски, во интервју за емисијата „Тема на ден“ на телевизија Сител, изјави дека премиерот Христијан Мицкоски е „одлична личност и домаќин“, и дека постојано размислува како да придонесе за напредокот на Северна Македонија.
„Имав чест да го запознаам премиерот пред многу години на краток состанок. Во изминатите години, развивме добри односи – тој прифаќа идеи и е одличен домаќин“, рече Павловски, кој има македонско потекло.
Тој нагласи дека има силна емоционална врска со земјата преку своето семејство. „Мојот татко е од Преспа, мајка ми е од Мариово. И двајцата се од мали села од тие региони. Ја сакам Македонија и сакам да ѝ помогнам на секој можен начин“, рече Павловски.
Тој потсети дека уште во 2011 година инвестирал во компании во земјава и вработил голем број луѓе, додавајќи дека и самата компанија Rumble има значително присуство во Македонија.
„Секогаш мислам на Македонија и на начините како да придонесам за нејзин напредок“, додаде тој.