Владата на Северна Македонија, составена од ВМРО-ДПМНЕ, ВЛЕН и ЗНАМ, ја одбележа првата година од мандатот со мешани оценки од јавноста, додека премиерот Христијан Мицкоски зборува за нови темели и економски напредок, а опозицијата предупредува на економска нестабилност и влошување на животниот стандард.
“Доаѓа времето на Македонија”, изјави премиерот Мицкоски, повикувајќи се на податоци за раст на БДП, странски инвестиции и зголемени пензии. Опозицискиот СДСМ, пак, тврди дека граѓаните живеат “на работ на достоинството” и оти растот на платите е блокиран.
Според Сојузот на синдикати, минималната потрошувачка кошничка за четиричлено семејство во мај изнесувала 62.691 денар, над двојно повеќе од две минимални плати. Владата во изминатата година обезбеди кредит од една милијарда евра од Унгарија и потпиша договор со Велика Британија за дополнителни шест милијарди евра.
Платформата “Компас”, предводена од тинк-тенкот Фајнанс тинк, оценува дека само 9% од социо-економските ветувања се исполнети, додека 44% се сеуште неисполнети. Најголема реализација е забележана во секторот образование.
Центарот за управување со промени (ЦУП) бележи “умерен напредок” во првите девет месеци, но предупредува на потреба од подобрување на кадровското планирање и дигитализацијата. Извршната директорка на ЦУП, Неда Малеска Сачмароска, укажува на неопходноста од исполнување на роковите поврзани со Планот за раст и европската помош.
Во делот на евроинтеграциите, Институтот за европска политика смета дека Владата покажува посветеност преку усогласување со надворешната и безбедносната политика на ЕУ. Сепак, експертите оценуваат дека нема подготвеност за уставни измени – клучен чекор за продолжување на пристапните преговори со Брисел.
Министерот за надворешни работи, Тимчо Муцунски, истакнува дека Северна Македонија е првата земја од регионот што потпишала Партнерство за безбедност и одбрана со ЕУ, но додава дека блокадата од Бугарија останува најголемата пречка во процесот.
Следната можна можност за напредок во дијалогот е Самитот на НАТО во Хаг, кој започнува утре, на кој ќе учествуваат претседателката Гордана Сиљановска-Давкова и бугарскиот премиер Росен Жељазков.