Вицепремиерот прв Изет Меџити го оцени како „историски момент“ усвојувањето на предлог-законот за правична и соодветна застапеност, нарекувајќи го прво јасно и целосно законско решение на уставната категорија од 2001 година.
„Иако ова прашање требаше да биде регулирано со закон уште во 2003 година, повеќе од две децении беше заложник на политичка волја. Предлог-законот гарантира еднаков пристап до вработување и напредување во јавната администрација, застапеност на сите заедници, но истовремено се базира на индивидуални заслуги и квалификации“, изјави Меџити.
Професорот по уставно право Јетон Шасивари, кој бил дел од работната група што го изработи текстот, изјави дека ваков закон требало да се донесе уште пред 20 години. Според него, новиот закон претставува напредок во однос на постојниот систем на Балансерот.
„Со овој закон се унапредува спроведувањето на уставниот принцип на правична и соодветна застапеност – од политичко на уставно-правно ниво, со конкретни механизми за имплементација, утврдени принципи и рокови. Законот воспоставува извршен правен инструмент – Координативно тело кое ќе функционира во рамки на Владата, што е гаранција за негова реализација“, рече Шасивари.
Во однос на критиките дека законот не предвидува санкции за прекршителите, Шасивари појасни дека целта не е казнување, туку спроведување на принципот на застапеност преку институционален механизам.
„Целта не е санкционирање, туку ефикасна имплементација. Координативното тело, како дел од извршната власт, ќе ја има уставната и законска обврска да го спроведува законот“, изјави Шасивари.
Запрашан за можните злоупотреби во одредувањето на етничката припадност, тој објасни дека ќе се користат податоци од личните документи, вклучувајќи го јазикот наведен во личната карта.
„Името и презимето во личната карта се јавен, задолжителен документ за сите полнолетни граѓани. Според амандманот V, став 3, како и Законот за употреба на јазиците и Законот за лична карта, тие се регистрираат и на друг службен јазик. Преку овие податоци, заедно со крстосување со други документи, ќе се спречат злоупотребите какви што ги имавме со Балансерот во минатото“, додаде тој.
Објавувањето на деталите од законот од страна на Алсат предизвика јавна дебата, а владината седница за негово усвојување е закажана за утре. По тоа, предлог-законот треба да биде испратен до Венецијанската комисија, а потоа ќе следува и парламентарна процедура.