Израел и Иран разменија нови напади во неделата, при што беа убиени десетици цивили, а ескалацијата предизвика стравувања од регионален конфликт. Американскиот претседател Доналд Трамп порача дека ситуацијата може лесно да се реши, но го предупреди Техеран да не напаѓа американски цели.
Двајца американски официјални лица за Ројтерс изјавија дека Трамп неодамна го одбил израелскиот предлог за ликвидација на врховниот ирански лидер ајатолахот Али Хамнеи.
„Дали Иранците убиле Американец? Не. Сè додека не го сторат тоа, не разговараме за напад врз нивното политичко раководство“, изјави висок функционер на американската администрација.
Во Израел, спасувачки екипи пребаруваа урнатини од станбени згради погодени од ирански ракети, при што беа убиени најмалку 10 лица, меѓу нив и деца. Вкупниот биланс на жртви за два дена се искачи на 13. Попладнево, по 16 часот, се активираа сирени низ целата земја, а Тел Авив повторно беше погоден од експлозии.
Во Иран, снимки од Техеран покажуваат голем пожар во нафтен резервоар по израелските напади врз иранскиот енергетски сектор. Властите соопштија дека 78 лица загинале во петокот, а дополнителни десетици во наредните денови, вклучително и 60 во саботен напад врз 14-катница, при што половината од жртвите се деца.
Трамп повтори дека САД би можеле да се вмешаат во случај на напад врз нив:
„Ако бидеме нападнати на кој било начин, целата сила на американската војска ќе се струполи врз вас на нивоа невидени досега“, порача Трамп преку Truth Social.
Во однос на наводниот израелски план за ликвидација на Хамнеи, израелскиот премиер Бенјамин Нетанјаху изјави за Fox News:
„Има многу лажни извештаи за разговори што никогаш не се случиле. Нема да навлегувам во тоа. Ние правиме што мора да се направи“.
И покрај тоа, тој додаде дека можно е промената на режимот во Иран да биде последица од израелските воени дејствија.
Израелската армија соопшти дека целта на тековната офанзива не е смена на режимот, туку уништување на иранската нуклеарна и ракетна програма.
„Операција Воскреснат Лав“
Израелската офанзива, наречена „Операција Воскреснат Лав“, започна во петокот утрото со напади врз врвниот ирански воен врв и делови од нуклеарните постројки. Израел најави понатамошна ескалација.
Во неделата вечер, Израел погоди две постројки за гориво со „двојна намена“, кои поддржувале воени и нуклеарни операции. Израел исто така соопшти дека погодил и авион за воздушно дотурање во источен Иран – најдолгиот напад досега.
Премиерот Масуд Пезешкијан рече дека одговорот на Иран ќе биде „сè поостар и поодлучен“ доколку Израел продолжи со офанзивата.
Израел ги предупреди иранските граѓани во близина на воени објекти да се евакуираат.
„Иран ќе плати висока цена за убиствата на цивили, жени и деца“, рече Нетанјаху од тераса над оштетени станови во Бат Јам, каде загинаа шест лица.
Пазарите го следат движењето на цените на нафтата
Во пресрет на отворањето на берзите во понеделник, трговците се подготвуваат за можна дестабилизација на нафтините цени. Израел досега избегнуваше да ги погоди извозните објекти на Иран, додека Техеран сè уште не ги реализираше заканите за блокада на транспортот во Персискиот Залив.
Цените на нафтата веќе скокнаа за 9% во петокот пред да започнат израелските напади врз нафтени и гасни постројки.
Извори од Вашингтон за Ројтерс потврдија дека американската војска помогнала во пресретнување на дел од иранските ракети насочени кон Израел, но дека САД директно не учествуваат во офанзивата.
Последниот круг од иранско-американските нуклеарни преговори, закажан за недела, е откажан откако Техеран соопшти дека нема да преговара додека траат израелските напади.
Израел соопшти дека операцијата може да трае со недели. Нетанјаху јавно ги повика иранските граѓани да се кренат против исламското духовно раководство на земјата.