Универзитетот на Југоисточна Европа (УЈИЕ) во саботата ја одржа својата годишна церемонија на дипломирање, на која студентите од 21. генерација ги фрлија капите во знак на завршување на студиите.
Настанот се одржа на главниот кампус во Тетово и собра дипломанти, нивните семејства, претставници на дипломатскиот кор, локални власти и универзитетскиот кадар.
Претседателот на Одборот на УЈИЕ, проф. д-р Клаус Тохтерман, во своето обраќање ги охрабри дипломираните да го искористат знаењето за да придонесат во општеството.
„Како дипломирани, вашата одговорност е да го примените она што сте го научиле и да направите значајна промена,“ изјави Тохтерман.
Ректорот акад. проф. д-р Абдулменаф Беџети ја нагласи важноста на дипломата во глобалниот пазар на труд.
„Вашата диплома е најверодостоен пасош и за западниот пазар – било за академски или професионален напредок, било за вработување,“ рече тој. Беџети најави дека неговиот мандат завршува за три месеци и изрази доверба во новото раководство, ветувајќи поддршка и во неговата идна улога.
Свечената атмосфера беше збогатена со настапот на NRG Band, додека студентската химна „Гласот на знаењето“ ја изведе професорот и пејач Агим Пошка.
Во името на генерацијата, студентката Њомза Бехадини изјави дека студиите на УЈИЕ претставувале повеќе од академски процес – тие биле пат на личен и професионален развој. „Подготвени сме за новата фаза и да бидеме двигатели на промени,“ рече таа.
УЈИЕ, основан во 2001 година, останува посветен на квалитетното образование, мултикултурализмот и интеграцијата во европскиот образовен простор.