Повеќе од 160 инспектори од изутрината се на терен и вршат проверки дали се почитува владината мерка за намалување на цените на одредени производи. По лебот, од денеска со пониски цени ќе можат да се набават и тестенините и млечните производи, а нов пад на цените се најавува и од идната недела – со кој треба да бидат опфатени шеќерот. јајцата и оризот.
„Државниот пазарен инспекторат постапува со полн капацитет. Досега има намалување на цените и од утрово нема нерегуларности“, вели директорот на Државниот пазарен инспекторат (ДПИ) Горан Трајковски кој заедно со премиерот Димитар Ковачевски и министерот за економија Крешник Бектеши посети скопски маркет по повод владините одлуки за новите, замрзнати цени на тестенините и млечните производи.
Ковачевски си испазари млеко, леб, макарони од маркетот, а за целата сметка плати 328 денари.
Високи казни
ДПИ ќе ги објави имињата на субјектите ако утврди нерегуларности зашто одлуките се во интерес на граѓаните. „Ова нека биде поттик трговците самосвесно да ги намалат цените“, вели Трајковски. Санкциите за непочитување на мерките се високи од 800 до 10 000 евра.
Цените се намалени за 15 отсто на тестенините и за 10 проценти на млечните производи. Според премиерот Димитар Ковачевски, намалувањето на цените на овие производи битно ќе влијае врз џебот на граѓаните. „Се покажа дека владините одлуки се исправни. Нема да дозволиме личен профит врз грбот на граѓаните. Очекувам компаниите да имаат разбирање за општото добро“, вели тој.
Нови цени и за шеќерот, јајцата и оризот
До крајот на наредната недела Министерството за економија ќе подготви информација за секој производ и согласно тоа ќе се креираат нови мерки кои ќе следуваат најверојатно во април. Мерките ќе бидат насочени кон стопанството и граѓаните. Министерот за економија Крешник Бектеши најави дека на почетокот на наредната недела ќе се донесат одлуки за цените на шеќерот, јајцата и оризот.