Коалицијата ВЛЕН преку соопштение ја информира јавноста дека новата Влада е длабоко посветена на европската агенда и активно работи на достоинствено исполнување на условите што ќе го забрзаат процесот кон полноправно членство во Европската унија.
„Новата Влада, во која коалицијата ВЛЕН е одговорен и активен партнер, е длабоко посветена на европската агенда. Таа активно работи на достоинствено исполнување на условите што ќе го забрзаат процесот кон полноправно членство во Европската унија.
Ние, министрите на ВЛЕН, отсекогаш сме демонстрирале највисока посветеност кон европските интеграции, не само со зборови, туку и со дела. Шестмесечниот рок не е само временска рамка, туку и обврска што ја разбираме и ја почитуваме. Сепак, потребно е да се почитува политичката логика и реалноста. Постои ли двотретинско мнозинство во Собранието без пратениците на ВМРО-ДПМНЕ? Не, не постои. Токму тука лежи суштината: интеграцијата бара соработка, зрелост и одговорност од сите политички субјекти“.
„ВЛЕН не ги заборава обврските, но потсетуваме дека решението не може да биде еднострано. Владата има јасен план, стратегија и конкретни чекори што се преземаат секојдневно. Нашата поддршка, не само сега, туку и во минатото, спаси клучни процеси. Со таков чекор го обезбедивме почетокот на преговорите со ЕУ. Апелираме до сите општествени фактори, вклучувајќи ги и политичките партии, да престанат со манипулациите на политиката на штета на европските интеграции. Европската иднина е над дневната политичка калкулација,“ стои во соопштението на ВЛЕН.