Градоначалничката на Скопје, Данела Арсовска, ги отфрли како политички мотивирани обвинувањата околу интервенцијата на водоводната мрежа, нарекувајќи ги „координирани напади од ботови“ на нејзиниот колега од Чаир, Висар Ганиу.
Арсовска преку објава на Фејсбук истакна дека ЈП „Водовод и канализација“ уште на 27 мај ги информирало медиумите дека на 31 мај ќе се изврши комплексен водоводен зафат кој се реализира еднаш на 60 години. Според неа, целта е подобрување на водоснабдувањето и намалување на загубите на вода.
„Интервенцијата опфаќа изведба на главен приклучок и монтажа на игличест регулационен вентил во нова мерна шахта, што е дел од стратегијата за создавање циркуларен прстен меѓу главните магистрални цевководи на Скопје,“ напиша Арсовска.
Таа објасни дека зафатот е изведен успешно и дека повторното пуштање на водата се спроведува постапно за да се избегнат дефекти.
„Доколку медиумите ги пренесуваа целосно соопштенијата од Водовод, граѓаните ќе ја разбереја важноста на зафатот,“ додаде таа, повикувајќи на трпение и разбирање.
Со овој проект, новиот магистрален цевковод со пречник од 700mm, кој ќе се постави долж булевар Хрватска, ќе го поврзе постоечкиот цевковод кај Железара со оној на булевар Александар Македонски. На тој начин, според градските власти, се создава основа за посигурен и одржлив систем за водоснабдување во главниот град.