Националната и универзитетска библиотека „Св. Климент Охридски“ – Скопје донираше 125 наслови со вкупно 264 примероци на Агенцијата за иселеништво, соопштија во понеделникот институциите.
Донацијата, која вклучува и изданија како македонскиот правопис, е дел од програмата за одбележување 80 години од кодификацијата на македонскиот стандарден јазик. Книгите се наменети за летната школа за изучување на македонскиот јазик во Охрид, како и за потребите на училишта и литературни друштва во македонското иселеништво.
„Со оваа донација ја јакнеме врската со дијаспората и придонесуваме за негување на македонскиот јазик надвор од татковината“, изјави директорот на НУБ, Јовица Никчевски.
Во знак на благодарност, директорот на Агенцијата за иселеништво, Горан Ангелов, ѝ подари на библиотеката икона со ликот на Св. Климент Охридски. Никчевски, пак, ја збогати библиотечната збирка на Агенцијата со новата монографија „Национална и универзитетска библиотека ‘Св. Климент Охридски’ – Скопје: Ризница на знаењето, чувар на наследството“.