Министерството за здравство соопшти дека презема засилени мерки за обезбедување континуирана терапија за пациентите со ретки болести, наведувајќи дека лекувањето се одвива без прекини.
Во соопштението се вели дека терапијата се обезбедува за сите пациенти, вклучително и лекот „сиролимус“ за третман на туберозна склероза.
Министерството најави дека новиот Закон за лекови ќе овозможи побрзи процедури за одобрување и регистрација, преку модернизација на системот и скратување на времето за достапност на лековите. Законот предвидува и воспоставување механизми за следење на снабдувањето со цел да се спречи евентуален недостиг.
Дополнително, властите воведуваат тригодишен модел на јавни набавки, кој ќе започне во 2026 година и се оценува како клучен за стабилноста на терапијата за пациентите.
Во рамки на новата набавка, техничката спецификација е проширена со 12 нови лекови, со што државата ќе обезбеди вкупно 72 лекови преку програмата за ретки болести.
Ова претставува значително зголемување во споредба со претходните години и, според Министерството, ќе овозможи поголем број пациенти да добијат бесплатна и современа терапија.