Демократската унија за интеграција најави протестен марш во петок, на 26 јуни, во 20 часот, на плоштадот „Илирија“ во Тетово, по одлуката на Уставниот суд да ја укине одлуката од 2007 година за преименување на улици, плоштади и други инфраструктурни објекти во општината.
Протестот доаѓа по серијата реакции на ДУИ, која ја обвини Општина Тетово дека не ја заштитила одлуката пред Уставниот суд. Од партијата велат дека општината не одговорила на нивното барање за итна седница на Советот, на која требало повторно да се разгледа прашањето за имињата на улиците.
Бајрам Реџепи од ДУИ изјави дека одлуката на судот не е само административно прашање, туку, како што рече, удар врз историјата, идентитетот и достоинството на Албанците во Тетово.
„Ова не е само прашање на имиња на улици. Ова е обид да се негираат преродбениците, историјата, наследството и секое албанско достигнување изградено со жртва во последните 20 години“, рече Реџепи.
Тој ги повика граѓаните, интелектуалците и активистите, без разлика на политичката припадност, да се приклучат на мирниот протестен марш.
Уставниот суд ја укина одлуката од 2007 година со образложение дека при нејзиното донесување не била доставена потребната согласност од Владата. Судот наведе дека во текот на постапката четири пати побарал документација од Општина Тетово, а три пати од Владата, но потребните документи не биле доставени.
Од Општина Тетово претходно изјавија дека прашањето за имињата на улиците ќе се решава во рамки на нов процес што веќе бил започнат во општината. Сепак, не беше прецизирано кога постапката ќе биде завршена.
Одлуката на Уставниот суд предизвика политички реакции и нови обвинувања меѓу ДУИ и актуелната локална власт во Тетово.