Пратеничката на ВМРО-ДПМНЕ, Емилија Ангелова, изјави дека Владата спроведува реформи со кои, како што рече, се подобрува квалитетот на образовниот систем и се обезбедува поголема сигурност за учениците и наставниците.
Според Ангелова, втора година по ред учебниците за сите одделенија биле доставени пред почетокот на учебната година, при што биле набавени повеќе од еден милион примероци по пониски цени, со што, како што наведе, во последните две години биле заштедени околу 45 милиони денари.
Таа додаде дека по седум години повторно се обезбедени учебници по странски јазици – англиски, француски, германски и италијански.
Во однос на наставниот кадар, Ангелова рече дека со спогодбата потпишана со СОНК е предвидено зголемување на платите од 40 до 60 проценти во следните четири години, зависно од инфлацијата, а во првите две години платите веќе се зголемени за повеќе од 20 проценти.
Таа истакна дека за првпат е овозможен кариерен напредок за наставниците и стручните соработници во средното образование преку избор во звања ментор и советник.
Според пратеничката, бројот на образовни асистенти е зголемен на 1.350 во основните училишта, а за првпат се ангажирани и 150 асистенти во средното образование.
Ангелова рече дека повеќе од 160 училишта се опремени со нова ИТ-опрема, дигитализирани се услугите за учениците и студентите, воведен е нов електронски дневник и електронски свидетелства, како и насоки за етичка примена на вештачката интелигенција, при што биле обучени над 1.000 наставници.
Таа додаде дека во првата година од мандатот Владата инвестирала повеќе од 70 милиони евра во изградба, реконструкција и проширување на училишта и спортски сали.
Изјавите на Ангелова претставуваат ставови на владејачката ВМРО-ДПМНЕ. Опозициските партии досега повеќепати ги оспоруваа оценките на Владата за состојбите во образованието и бараа независна анализа на ефектите од спроведените политики.