Северна Македонија го активираше Механизмот за цивилна заштита на ЕУ за да побара помош за евакуација на 15 пациенти со тешки изгореници. Центарот за координација на итен одговор на ЕУ веднаш стапи во контакт со македонските власти за цивилна заштита по инцидентот за да понуди поддршка.
Мерката доаѓа доаѓа по пожарот што изби рано во неделата во ноќен клуб во Кочани, Северна Македонија, при што загинаа 59 лица, а повеќе од 155 беа повредени.
Девет европски земји — Хрватска, Грција, Романија, Словенија, Шведска, Литванија, Унгарија, Луксембург и Норвешка — брзо одговорија со понуди за помош преку механизмот. Неколку пациенти веќе беа евакуирани во Унгарија со поддршка на Луксембург, додека Романија го координира транспортот на пациенти во Литванија. ЕУ сега го надгледува трансферот на дополнителни пациенти во земјите што понудија медицински третман.
„Изразуваме најдлабоко сочувство до семејствата на жртвите и сите погодени,“ изјави Хаџа Лахбиб, комесарка на ЕУ за подготвеност, управување со кризи и еднаквост. „ЕУ стои солидарно со народот на Северна Македонија во ова тешко време. Им се заблагодарувам на европските земји што брзо понудија третман и помош на жртвите преку нашиот Механизам за цивилна заштита.“
Механизмот за цивилна заштита на Европската Унија е систем за координација на одговорите на природни непогоди, технолошки несреќи и хуманитарни кризи, како во Европа така и пошироко. Кога земја членка на ЕУ или земја партнер се соочува со голема криза што ја надминува нејзината способност за справување, може да поднесе барање за помош преку механизмот. Откако ќе се активира, Центарот за координација на итен одговор (ERCC) делува како централна точка за координација на понудената помош од земјите учеснички, што може да вклучува медицинска евакуација, спасувачки тимови, опрема и друга хуманитарна поддршка.
ЕУ останува во блиска комуникација со властите на Северна Македонија и е подготвена да мобилизира дополнителна помош доколку е потребно.