Владата побара да се започнат активности за поништување на решението за прием во државјанство на Северна Македонија за лицето Олександер Онишченко.
Владата го иницираше барањето за одземање на државјанство на Онишченко, по одржаната владина седница на којашто Агенцијата за национална безбедност информираше за случајот.
Украинскиот државјанин Онишченко, кој се наоѓа на „црната листа“ на САД поради неговите врски со руските власти, доби македонско државјанство како спортист во еквестријан на предлог на Коњичката федерација. Одлуката за доделување македонско државјанство на Онишченко ја донесе Владата, по добиено позитивно мислење од сите надлежни институции.
Претходно денеска директорот на Агенцијата за национална безбедност (АНБ) Виктор Димовски на затворена владина седница даде извештај за случајот со давањето на македонско државјанство на контроверзниот Укранинец.
Премиерот Димитар Ковачевски претходно рече дека дека мора да се утврди одговорност за случајот со давањето на македонско државјанство на Онишченко.
Директорот на АНБ Димовски во петокот по сослушувањето во Собрание, изјави дека е лоцирано лице кое не го испочитувано последното ниво од безбедносната проверка и не била направена консултација со НАТО партнерите пред да се даде позитивно мислење за државјанство за Онишченко.