Хрватскиот премиер Андреј Пленковиќ денеска оцени дека претседателот Зоран Милановиќ, со своите изјави, „го урива надворешнополитичкиот кредибилитет на Хрватска“.
Неговата реакција следува откако Милановиќ вчера изјави дека „Крив веќе нема да биде Украина“. На неговата изјава денеска реагираше и портпаролот на украинското Министерство за надворешни работи Олех Николенко, кој на Фејсбук напиша дека е неприфатливо што Милановиќ го доведува во прашање „територијалниот интегритет на Украина“.
Русија нелегално го анектираше Крим од Украина во 2014 година.
Во изјава за новинарите во Загреб, Пленковиќ рече дека „Украинците реагираат така како што треба да се реагира“.
„Реагираат на оној кој во меѓународната заедница го урива нашиот надворешнополитички кредибилитет, а тоа е Милановиќ, кој изговара погрешни реченици“, рече Пленковиќ.
Тој додаде дека Хрватска има одлични односи со Украина, а дека Милановиќ „изговара погрешни ставови и судови“.
Милановиќ вчера изјави дека „Крим веќе нема да биде Украина“ и дека „Косово е одземено од Србија“.
Претседателот Милановиќ доаѓа од Социјалдемократската партија, додека премиерот Пленковиќ е претседател на конзервативната Хрватска демократска заедница. Тие веќе долго време имаат нарушени односи.