Нема тековни дискусии за пристапување на Украина во НАТО на претстојниот самит во јули во Вилнус, Литванија, изјави шефот на НАТО Јенс Столтенберг, за време на прес-конференцијата во Берлин денес.
Столтенберг рече дека нема да има формална покана на Украина во НАТО, но дека ќе има активни дискусии за време на самитот во јули за „како Украина да се приближи до НАТО“.
Тој рече дека фокусот на самитот ќе биде на тоа како да ѝ се помогне на Украина успешно да се одбрани од Русија.
Столтенберг потврди дека постои консензус меѓу членките на НАТО дека еден ден Украина ќе се приклучи на Алијансата, истакнувајќи дека Русија нема право на вето на таа одлука.
Амбициите на Украина за приклучување кон НАТО ѝ претходат на руската инвазија минатата година и на нејзината анексија на Крим во 2014 година.
Американскиот претседател Џо Бајден во саботата рече дека неговата администрација нема да „го олесни“ пристапот на Украина во НАТО, истакнувајќи дека нацијата опустошена од војна мора да ги исполни истите критериуми како и другите земји-членки.
Според Акциониот план за членство во НАТО, земјите-кандидати мора да направат воени и демократски реформи пред да се разгледаат за членство во НАТО.
Украинскиот претседател Володимир Зеленски го притисна раководството на НАТО и Европската унија за временска рамка за пристапот на Украина.