По интервенција надлежните институции денеска во тетовското село Бозовце, Шар Планина, е спасена мечка која била заглавена во метална сајла, пренесува Инбокс7.
“По дојава на локален жител од село Бозовце дека во неговото бачило е заглавена мечка, Ј.У.Н.П. Шар Планина заедно со стручни лица од Јавната Установа Зоолошка градина на град Скопје организираа акција за ослободување на животното. Возрасниот мажјак кој беше заглавен во сајла околу 10 часа, беше изморен и исплашен, а по 3 часа работа Бозо беше успешно ослободен”, се вели во информацијата на НП Шар Планина.
Мечките се строго заштитени жители на Шар Планина, а локалното население од планинските села живее во соживот со природата.
“Упатуваме благодарност до сопственикот на бачилото кој го пријави настанот за да се ослободи мечката. Благодарност и до полициските службеници за напорите да го обезбедат теренот, како и до сите други надлежни институции со кои се координираше акцијата”, вели во соопштението НП Шар Планина.