Кандидатот за претседател од редовите на опозициската коалиција ВРЕДИ, Арбен Таравари, синоќ во Приштина се сретнал со премиерот на Косово, Албин Курти.
Целта на средбата не е позната, додека на истата биле присутни и Илир Џафери, синот на поранешниот лидер на ДПА Арбен Џафери, како и Фета Алими, личноста која му го спаси животот на Зијадин Села во настаните од 27 април 2017 година во македонското Собрание.
„Сега сме во Приштина на средба на Албанците со голема симболика! Со Илир Џафери, наследникот на Арбен Џафери, со Фета Алими, храбар на храбрите, и со премиерот на Република Косово, Албин Курти, кој е поддржувач на нашата кауза, инспиративен и пример за големи движења!
ПРОМЕНАТА ПОЧНА!“, напиша Таравари на неговиот Фејсбук профил.
Инаку, коалиција ВРЕДИ беше договорена токму во канцеларијата на косовскиот премиер Курти, додека три кандидати на нејзините листи на кандидати за претседател се предложени од Самоопределување.