Тврдењето на шефот на канцеларијата на германската Фондација Конрад Аденауер во Скопје за отсуство на ЕУ како главна тема на овие пртседателски и парламентарни избори во Северна Македонија, наспроти острите конфронтации помеѓу главните играчи токму за ЕУ е, ако ништо друго, фрлање вода на бензин!
Пишува: Сељадин Џезаири
Деновиве, шефот на канцеларијата на германската Фондација Конрад Аденауер во Скопје, Даниел Браун, не потсети кои ни се главните главоболки во предвечерието на големото финале на претседателските и парламентарните избори. Браун, свесно или не, зазеде страна со тврдењето дека „ЕУ не е главна тема“:
„Темата за корупцијата, лошата состојба на здравствениот систем, аерозагадувањето, животната средина, образованието и економијата, ЕУ не е главна тема.“ (Браун за Дојчландфунк).
За воља на вистината, „Фронтот за Европа” (ДУИ) и „Нема откажување од иднината”(СДСМ), во целата изборна кампања се со полна уста за ЕУ! Зарем прашањата врзани за корупцијата, здравствениот систем, животната средина и економијата, па и образованието, не се дел и од предизборните кампањи на целиот европски континент?
Тврдењето на претставникот на реномираната германска фондација, колку и да има одредена партиска боја, сепак не го отсликува главниот проблем на земјата: како нанапред до одредената цел: полноправно членство во Европска Унија? Оти, како што стојат работите, не е дека не се забележува евроскептицизмот кај апслутниот победник на овие избори: ВМРО-ДПМНЕ. Република Северна Македонија има своите домашни задачи, токму врзани за темите што ги спомнува шефот на канцеларијата на германската Фондација Конрад Аденауер во Скопје, но и за влегување во европското семејство. Впрочем, ценетиот Даниел Браун, би требало да знае дека, да речеме, и наспроти големите разлики помеѓу двете албански коалиции (ВРЕДИ и Фронт за Европа), сепак членство во Европската Унија е можеби едиствена нишка што ги поврзува. На страна, кој са залага со зборови, а кој со дела!
Индиферентноста кон ЕУ-интегративниот процес на одделни политичко-партиски чинители во земјата, а и вон неа, секако може да има прескапа цена за целата земја, во оваа тешка и сложена светска изборна година, обременета и со две сериозни кризни жаришта (Украина и Блискиот Исток). Оттука, трдењето за отсуство на ЕУ како главна тема, наспроти конфронтациите помеѓу главните играчи токму за ЕУ е, ако ништо друго, фрлање вода на бензин
!