Лидерот на Алијансата за Албанците и министер за здравство, Арбен Таравари, изјави дека партијата Влен, која во моментов е коалиција од четири партии, би можела да се обедини во една политичка структура по локалните избори.
„До локалните избори сигурно нема да има спојување, а по нив можно е сите четири партии да се обединат во една,“ изјави Таравари за Радио Слободна Европа.
Таравари, кој во последниот период се соочува со правни спорови околу лидерството во Алијансата за Албанците, истакна дека „поважно е кој ги има членовите, а не како ќе се нарекува партијата“.
Во однос на неговата работа како министер за здравство, Таравари призна дека состојбата во здравствениот сектор е лоша, но ја припиша на децениско занемарување.
„Ситуацијата во здравството е катастрофална, но не само последните седум месеци. Дури и да сакате, невозможно е да уништите еден совршен здравствен систем за толку кратко време,“ рече тој.
Тој најави зголемување на платите за здравствените работници, нови вработувања на специјализанти и проширување на позитивната листа на лекови.
Таравари исто така предложи отпис на долговите на болниците, нагласувајќи дека нивното тековно финансиско работење е неодржливо.
„Повеќето болници се сериозно задолжени. Единствено решение е да се изнајде механизам за бришење на тие долгови, бидејќи со тековните буџети, нивната исплата е речиси невозможна,“ додаде тој.