Министерот за здравство Арбен Таравари изјави во неделата дека, иако завршуваат официјалните денови на жалост, болката останува — тивка, длабока и лична. Заедно со неа, додаде тој, останува и чувството на должност да се продолжи со грижата за оние кои сè уште се борат за своите животи.
„Оваа трагедија нè стави на сериозен испит — како луѓе, како институции и како здравствен систем. Но уште повеќе, нè обедини во заедничка мисија: да направиме сè што е можно за секој живот што продолжува да се бори“, рече Таравари во објава на неговиот Фејсбук профил.
Тој истакна дека состојбата на пациентите кои се згрижени во македонските болници моментално е стабилна, посочувајќи дека тоа е резултат на брзата реакција, ангажманот на целиот здравствен систем и големата посветеност на медицинските тимови.
„Остануваме во постојана координација со странските клиники каде што се лекуваат дел од најтешко повредените. Со нетрпение го очекуваме денот кога ќе можеме да објавиме дека тие се враќаат дома, еден по еден. Се надеваме дека нивниот број ќе расте секој ден“, додаде тој.
Таравари им се заблагодари на граѓаните, институциите, организациите и здравствените работници за нивниот придонес преку експертиза, логистика, грижа и емпатија.
„Секоја подадена рака е вредна. Ќе продолжиме да бидеме таму каде што е најпотребно, покрај пациентите, со сето знаење, внимание и одговорност кои тие ги заслужуваат“, рече Таравари.