Глобалните политички случувања создаваат зголемена неизвесност, предизвикувајќи тензии во повеќе држави, вклучувајќи ја и Канада, која неодамна најави трговска војна со САД. Во Европа, исто така, расте загриженоста поради новите геополитички предизвици, што предизвикува поделби и несигурност меѓу глобалните сојузници. Во овој контекст на нестабилност, албанскиот политички фактор во регионот доживува еден од најзначајните моменти на зближување, вели Арбен Таравари, лидер на албанската владина коалиција ВЛЕН, пренесува Инбокс7.
„Историјата покажува дека Албанците ретко успевале да ја одржат политичката кохезија, но овој пат сведочиме за значително зближување“, напиша Таравари на неговиот фејсбук профил, посочувајќи на неколку клучни средби меѓу политичките лидери од Албанија, Косово и Северна Македонија.
Една од најважните промени, според него, е јасната и координирана соработка меѓу албанските премиери – Аљбин Курти од Косово и Еди Рама од Албанија. Нивните заеднички настапи на меѓународните форуми, како и јасните знаци на политичко усогласување, испраќаат порака за нова фаза во односите меѓу албанските држави.
„Сликите од нивните меѓународни средби покажуваат безусловна политичка соработка. Ова е еден од најголемите пресврти во албанската политичка историја во последните 25 години“, вели Таравари.
Дополнителен аспект на ова зближување е засилената улога на Албанците во Северна Македонија, кои, според Таравари, сега имаат поголема поддршка и внимание од владите во Тирана и Приштина.
„Не само што не сме оставени настрана, туку стануваме клучен фактор во регионалната политика. Конечно, добиваме тоа што го заслужуваме“, додава тој.
Таравари ја цитира белгиската национална девиза „L’Union fait la Force“ („Единството создава сила“), поврзувајќи ја со историското наследство на Ѓерѓ Кастриот Скендербег.
„Време е ние, неговите потомци, повторно да го оживееме идеалот за единство што со векови го сонуваа милиони Албанци“, заклучува тој.