Повеќе од 20 хуманоидни роботи со две нозе се натпреваруваа во првиот полумаратон од ваков вид во светот, што се одржа во Пекинг. Иако технолошки напредни, машините не успеаја да ги надминат човечките ривали на 21-километарската патека.
Натпреварот, организиран во технолошкиот дистрикт Јичуанг во југоисточниот дел на кинеската престолнина, беше дел од обидите на Кина да ги прикаже своите достигнувања во областа на хуманоидната роботика, додека се обидува да го достигне технолошкиот напредок на САД.
Роботот Tiangong Ultra, развиен од Центарот за иновации во хуманоидна роботика во Пекинг, ја заврши трката за 2 часа и 40 минути – речиси два часа подолго од светскиот рекорд за луѓе во оваа дисциплина. Според организаторите, роботите трчаа во посебна оградена лента, паралелно со околу 12.000 човечки учесници.
„Не сакам да звучам претенциозно, но сметам дека ниту една западна компанија не постигнала спортски резултати како Tiangong“, изјави Танг Џијан, технички директор на центарот, за агенцијата Reuters. Тој додаде дека роботот променил батерии само трипати за време на трката.
Иако некои од роботите беа контролирани со далечински управувачи или водени со помош на лента, речиси сите имаа асистенти кои трчаа покрај нив за безбедност. Промената на батерии беше дозволена, а дозволена беше и замена на робот со друг, но секоја замена носеше казна од 10 минути.
Според кинеските државни медиуми, роботите мораа да се справат со мали нагорнини и кривулести делови од патеката, започнувајќи од еден рурален парк во близина на градот.
Видеа со кинески хуманоидни роботи кои изведуваат акробации, возат велосипеди или изведуваат боречки вештини се проширија низ интернетот во изминатите месеци, честопати промовирани од државните медиуми како симбол на идниот економски раст.
Во документ од 2023 година, кинеското Министерство за индустрија и информатичка технологија ја прогласи хуманоидната роботика за нова технолошка гранка од стратешко значење, со цел масовно производство до 2025 година и воспоставување сигурни синџири на снабдување за клучните компоненти.
Иако вештачката интелигенција брзо напредува и покренува дебата за нејзините последици врз општеството, саботниот полумаратон покажа дека барем во трчањето – луѓето сè уште водат.