Собранието на Северна Македонија обезбеди Бадинтер мнозинство и изгласа законски измени со кои Инспекторатот за употреба на јазиците добива статус на правно лице, со што вработените по шестмесечна пауза ќе добијат плата.
Пратениците со 72 гласа „за“ и 3 „против“ од вкупниот број, и со 14 гласа „за“ и 5 „против“ од пратеници кои не се Македонци – го донесоа законот со потребното двојно мнозинство, познато како „Бадинтер“.
Во рамки на немнозинскиот дел (Бадинтер групата), против гласаа пратениците Митко Трајчулески, Арбана Пашоли, Сали Мурати, Ријад Шакири и Халил Снопче. Дел од пратениците од Европскиот фронт и од Левица воопшто не гласаа.
Покрај измените за Инспекторатот, со Бадинтер помина и изборот на новите членови на Советот на Агенцијата за аудио и аудиовизуелни медиумски услуги. Тие беа избрани со 20 гласа „за“ и 4 „против“. Меѓу поддржувачите беа и тројцата пратеници од Алтернатива на Таравари, бидејќи меѓу избраните е и нивниот кандидат, Афрона Верзиволи. Против гласаа пратеници од Левица и дел од Европскиот фронт, вклучително и Талат Џафери и Сали Мурати.
Собранието го изгласа и новиот Програмски совет на МРТ, повторно со Бадинтер мнозинство. Точно 20 пратеници гласаа „за“, што е минималниот потребен број. Поддршката дојде од двајца пратеници од СДСМ, тројца од Алтернатива и независниот пратеник Бејџан Иљас.
Од вкупно 120 пратеници, 40 не се етнички Македонци, но само 39 имаат право на глас според Бадинтер, бидејќи пратеничката Рашела Мизрахи е од еврејската заедница, која не е опфатена со Уставот во делот за заедничко гласање.
Во моментов, парламентарното мнозинство има поддршка од само 14 не-Македонски пратеници, додека опозицијата располага со 25. Според Деловникот и Рамковниот договор, законите што се однесуваат на културата, употребата на јазиците, локалната самоуправа, образованието, личните документи и симболите, мора да бидат усвоени со мнозинство и од не-Македонските пратеници – т.н. „Бадинтер мнозинство“, што значи минимум 20 гласа.