Владејачката партија ВМРО-ДПМНЕ го обвини в.д. градоначалникот на Кочани, Венко Крстевски, за, како што наведува, „опасна незаинтересираност“ и загрозување на јавната безбедност, откако Владата објави дека оваа општина не учествува во новата програма за ангажирање 400 лица во борбата против шумските пожари.
„Крстевски свесно работи против интересите на граѓаните и на Територијалната противпожарна единица“, стои во соопштението на ВМРО-ДПМНЕ, при што се нагласува дека граѓаните се загрижени за безбедноста и прашуваат „кому му служи градоначалникот“.
Програмата, презентирана од Владата, предвидува привремено ангажирање на 400 невработени лица кои ќе добиваат месечна поддршка од 24.000 денари, со можност за трајно вработување. Според официјалните податоци, мерката опфаќа 14 општини, но Кочани и Струмица не се меѓу нив.
Крстевски, пак, тврди дека Општина Кочани навреме ја поднела апликацијата. „Формуларот е уредно испратен до надлежните институции“, изјави тој за локалните медиуми.
Се уште не е јасно дали постои административна грешка или комуникациски пропуст меѓу локалната и централната власт.