Министерството за економија и труд ќе ја разгледа анализата на Државниот пазарен инспекторат за цените во јуни и врз основа на наодите ќе одлучи дали ќе воведе нови мерки против трговците кои неоправдано ги зголемуваат цените, изјави министерот Бесар Дурмиши.
„Ако извештајот покаже девијантно однесување, ќе следат ригорозни мерки. Таквите практики се неприфатливи, особено кога се прават на штета на граѓаните во време на празници или зголемена побарувачка,“ рече Дурмиши.
Министерството веќе анализира податоци од мај, кога е забележано очекувано зголемување на цените на основните прехранбени производи, но според Дурмиши, секое енормно поскапување ќе биде санкционирано.
Властите не ја исклучуваат можноста за повторно ограничување на трговските маржи или други пазарни интервенции, доколку продолжат злоупотребите. Министерството очекува финалниот извештај до средината на јули.