Коалицијата ВЛЕН најави дека ќе поднесе кривична пријава до Основното јавно обвинителство во Скопје против тогашното раководство на Државниот завод за статистика, како и против поранешни функционери од Владата предводена од ДУИ и СДСМ, под сомнеж за „намерна манипулација“ со резултатите од пописот на населението во 2021 година.
„Со оваа манипулација е драстично намален бројот на Албанците во неколку села, населени места и градови, што резултираше со губење на уставно загарантирани права,“ изјави Фатмир Сабриу од ВЛЕН.
Од ВЛЕН обвинија дека методологијата за пописот била предмет на политички договори, со кои дијаспората била целосно исклучена од конечниот број на резидентно население. Лидерот на ДУИ, Али Ахмети, претходно изјави дека пописот бил „во рамките на договорите“, што коалицијата го оцени како „јавно признание за политичка трговија“.
ДУИ досега не коментираше детално за најавената кривична пријава, додека експерти за изборна правда предупредуваат дека евентуално судско разгледување на пописот може да има сериозни политички и правни импликации.