СДСМ го обвини министерот за правда Игор Филков дека ги држи „во фиока“ документите за екстрадиција на поранешниот премиер Никола Груевски, кој е во Унгарија со политички азил.
Од партијата прашуваат зошто, ако Основниот кривичен суд Скопје ја доставил документацијата, таа сè уште не е испратена до унгарските институции.
„Сега тие документи се во Министерството за правда, а министерот од ЗНАМ, дел од тендер-коалицијата на Мицкоски, не ги испраќа во Унгарија“, велат од СДСМ.
Според претходни информации, Министерството за правда побарало од Кривичниот суд да ги достави сите промени што би можеле да влијаат врз постапката за екстрадиција, а судот ги доставил потребните одговори.
Министерот Филков претходно изјави дека се чека формирањето на новата влада во Унгарија, по што тамошните институции би биле известени дека Македонија е заинтересирана за случајот со Груевски.
СДСМ тврди дека нема причина да се чека нова влада и дека институциите треба веднаш да постапат.
„Мицкоски и неговата влада свесно го штитат Груевски и му даваат време да побегне во трета држава“, наведуваат од партијата.
Прашањето за екстрадиција повторно се актуализираше по изборите во Унгарија, каде Петер Маѓар, кој се очекува да стане нов премиер, најави дека Унгарија нема да биде „депонија за странски криминалци“ и ја спомена можноста за екстрадиција на Груевски.
Сепак, правни експерти предупредуваат дека азилот не може да се укине преку ноќ. Додека Груевски има статус на азилант, неговата екстрадиција не може веднаш да се реализира.
Ако се врати во земјата, Груевски треба да издржи затворска казна од десет и пол години за предметите „Насилство во Центар“ и „Плацеви на Водно“.