Северна Македонија повторно се потпира на двајца пензионирани пилоти за гаснење на летните пожари, откако властите потврдија дека само еден од трите авиони „ер трактор“ е моментално во функција.
Вршителот на должноста директор на Дирекцијата за заштита и спасување (ДЗС), Стојанче Ангелов, во вторникот потпиша договор за повторен ангажман на ветераните Стоје Арсовски и Васко Михалчев – пилоти со долгогодишно искуство кои и минатото лето беа клучни во воздушните интервенции.
„Арсовски и Михалчев ќе ги управуваат авионите тип Air Tractor AT-802A Fire Boss, додека се чека вториот авион да се врати од сервисирање во Австрија. Третиот останува неоперативен поради технички дефект,“ соопшти ДЗС.
Левица, опозициската партија, ја критикува Владата предводена од ВМРО-ДПМНЕ и ЗНАМ, оценувајќи дека по една година власт условите за работа на противпожарните служби се влошени, со „недостиг од кадар, нефункционални летала и минимална опрема“.
„Пензионирани херои повторно ја спасуваат државата, додека пожарникарите на терен немаат ни основни средства за интервенција,“ реагираше Левица.
Во услови на зголемен ризик од пожари и почеток на летната сезона, ангажманот на пензионираните пилоти се гледа како итна, но привремена мерка. Владата досега не најави конкретен план за обнова на летечката флота или обука на нови пилоти.
Инаку, пожарот во близина на селото Марвинци, во Валандовскиот регион, утринава повторно се реактивираше поради силниот и топол ветер, и покрај целодневните обиди за негово гаснење, соопштија локалните власти.
Во гаснењето на терен се ангажирани над 50 лица, додека Министерството за внатрешни работи распореди хеликоптерска единица за поддршка од воздух.
Пожарите во валандовско, дојранско и кај село Јосифово зафатија нискостеблеста шума и земјоделски површини на непристапен терен. Во пожарот кај Грчиште се повредени двајца вработени на „Македонски шуми“, потврдија од претпријатието.
„Иако дел од пожарите се ставени под контрола, опасноста не е целосно отстранета, а пожарот во Јосифово се движи кон првите куќи,“ изјавија надлежните.
Локалните власти апелираа до жителите да останат на безбедно и да ги следат насоките на противпожарните служби, додека засилен ветер и високи температури го зголемуваат ризикот од ширење на огнот.
Минатогодишните шумски пожари зафатија илјадници хектари и предизвикаа значителна штета, при што воздушната поддршка играше клучна улога во нивното ставање под контрола.