Седмиот Дигитален самит на Западен Балкан заврши во петок во Скопје со усвојување на две заеднички изјави и сет заклучоци што ја дефинираат дигиталната агенда на регионот во наредниот период.
Министрите и официјалните претставници од шесте економии на Западен Балкан потврдија дека ќе го зајакнат дигиталното поврзување со регионот и Европската унија, градејќи врз постигнатиот успех на режимот „роаминг како дома“ и декларацијата за роаминг меѓу ЕУ и Западен Балкан од 2023 година. Тие се обврзаа на усогласување со европското законодавство за роаминг и идно воведување на бесплатен роаминг меѓу двете страни, повикувајќи на дополнително намалување на цените.
Втората изјава се однесува на воведување интероперабилни дигитални идентитетски паричници и доверливи услуги во регионот. Земјите на Западен Балкан се согласија да ја хармонизираат регулативата, да ги зајакнат техничките капацитети и да обезбедат сигурен дигитален пристап за граѓаните и бизнисите во согласност со стандардите на ЕУ eIDAS 2.0.
Заклучоците од самитот повикуваат и на усогласување со европските регулативи за дигитални услуги, дигитални пазари и вештачка интелигенција, забрзување на развојот на широкопојасниот интернет, зголемување на сајбер-безбедноста преку соработка со ENISA и користење на новиот DESI dashboard за следење на напредокот. Поддршка добија и иницијативи за иновации и младинско учество, како „Балкатон“ на Регионалниот совет за соработка.
Дводневниот самит, коорганизиран од Владата на Северна Македонија и Регионалниот совет за соработка, ги собра лидерите од регионот, претставници на ЕУ, меѓународни партнери, компании, иноватори и граѓански организации за дискусија за дигитални услуги, интероперабилност, сајбер-безбедност, вештачка интелигенција и дигитални вештини.