Аеродромот во Минхен беше принуден да прекине со работа речиси седум часа во четвртокот навечер поради појава на дронови, станувајќи најнов европски воздушен хаб што затвори поради необјаснети летови на дронови.
Според соопштението од аеродромот, вкупно 17 летови беа откажани нешто по 22 часот, со што беа погодени речиси 3.000 патници. Уште 15 авиони што требаше да слетаат беа пренасочени кон германските градови Штутгарт, Нирнберг и Франкфурт, како и кон Виена во Австрија. Веб-страницата за следење на летови Flightradar покажа неколку авиони кои кружеле околу аеродромот пред да бидат пренасочени.
Аеродромот беше повторно отворен во пет часот наутро во петокот, кога беше проценето дека пристигнувањата и поаѓањата се безбедни, изјави оператор од центарот за информации за патници.
„Сè е нормализирано. Неколку летови беа откажани, но аеродромот е отворен. Од пет часот сите пристигнувања и поаѓања се одвиваат безбедно,“ рече тој.
Првиот авион што слета во Минхен беше лет на Lufthansa од Банкок, кој пристигна во 05:25 часот, според веб-страницата на аеродромот.
Аеродромот во Баварија, клучен центар за германскиот национален превозник Lufthansa, опслужи речиси 20 милиони патници во првата половина од годинава. Портпарол на Lufthansa изјави дека 19 нејзини летови биле откажани или пренасочени, вклучувајќи и три долги линии кон Азија кои ќе бидат прераспоредени.
Патниците добиле храна, пијалаци и ќебиња, а агенциски фотографии покажаа луѓе како спијат на импровизирани кревети во терминалот.
Германските власти сè уште не дале коментар за инцидентот.
Дронови над Европа
Минхен е најновиот аеродром во Европа кој мораше да се затвори поради дронови. Минатата недела, повеќе појави на дронови над дански аеродроми доведоа до проблеми за десетици илјади патници.
Данска потоа забрани сите цивилни летови со дронови во своето воздушно пространство, пред самитот на европските лидери во Копенхаген каде се дискутираше за поддршка на Украина и зајакнување на европската безбедност.
На самитот се разгледуваа мерки за заштита на европското небо, вклучувајќи иницијатива за „ѕид од дронови“ – мрежа од системи за откривање и пресретнување, која се надоврзува на националните капацитети против дронови во ЕУ.
Европа е во состојба на висока готовност поради низа појави на дронови и наводни инциденти со руски дронови во воздушниот простор на НАТО над Полска и Романија, како и поради наводно прекршување на естонскиот воздушен простор од руски ловци.
Данската премиерка Мете Фредериксен изјави дека иако властите немаат заклучок кој стои зад појавите во Данска, „можеме барем да констатираме дека постои една земја која најмногу претставува закана за европската безбедност – а тоа е Русија.“
Кремљ ги негира обвинувањата дека е вмешан во појавите на дронови или во нарушувањето на естонскиот воздушен простор.
За време на четиричасовно телевизиско обраќање во четвртокот, рускиот претседател Владимир Путин се потсмеваше на западните тврдења за можно руско вмешување, нарекувајќи ги дел од напорите на НАТО да ги „зголеми тензиите и воените трошоци.“
„Јас повеќе нема да одам. Ниту во Франција, ниту во Данска, ниту во Копенхаген,“ рече со иронија, алудирајќи на наводните летови со дронови.
Но, додаде и предупредување: „Внимателно го следиме растечкиот милитаризам на Европа. Дали сето ова се само зборови или време е да преземеме контрамерки? Никој не треба да се сомнева дека нашите мерки нема да чекаат долго.“
Минхен, историски град со повеќе од еден милион жители, веќе беше во тензија откако оваа недела познатиот фестивал Октоберфест беше прекинат за неколку часа поради дојава за бомба.