Коалицијата ВЛЕН денеска ја повика Демократската унија за интеграција (ДУИ) да престане со, како што велат, манипулации и дезинформации насочени кон јавноста.
„Како привилегирани партнери на СДСМ, оваа изгубена клика на ДУИ очигледно не може да го прифати фактот дека Венко Филипче ги напушта среде пат. Откако секојдневно се координираа како да профитираат политички од трагедијата во Кочани, денес Бujar Osmani, како врска со СДСМ, емотивно разнишан од разоткривањето на нивните планови, повторно ја повторува истата стара плоча,“ соопшти ВЛЕН.
Од коалицијата додаваат дека, наместо да се занимаваат со напади врз ВЛЕН, ДУИ треба да престане со ширење „лажни вести и манипулации, чија единствена цел е оправдување на нивните планови за бојкот на локалните избори – обид за создавање политичка криза и заштита на сопствените интереси.“
„ДУИ треба да разбере дека токму поради нивното криминално владеење, ВМРО-ДПМНЕ освои 58 пратеници на парламентарните избори минатата година. Нема тајни планови за елиминација на Албанците од кој било процес,“ се вели во соопштението.
Според ВЛЕН, единственото што постои е „патолошкиот страв на ДУИ од одговорност пред правдата за нивните поранешни функционери, кои со децении се збогатуваа на грбот на албанскиот народ, додека во позадина договараа криминални зделки со Груевски и Мијалков.“
„Овие антиалбански политики на ДУИ ќе имаат висока цена, бидејќи нашиот народ нема да дозволи да биде заложник само затоа што некои политичари не се навикнати да бидат во опозиција,“ соопшти ВЛЕН.