Претседателот на Европскиот совет, Антонио Коста, води дипломатска офанзива за да ја придвижи кандидатурата на Украина за членство во ЕУ, и покрај противењето на Унгарија, велат дипломати пред клучниот самит оваа недела во Копенхаген.
Коста бара поддршка од европските престолнини за промена на правилата што бараат едногласна согласност од сите 27 членки за отворање на пристапните преговори. Според неговиот предлог, кластерите од преговорите би можеле да се отвораат со квалификувано мнозинство, додека за нивно затворање би останало потребно едногласие.
Потегот е насочен кон заобиколување на унгарскиот премиер Виктор Орбан, кој го користи правото на вето за да го блокира процесот. Застојот ја задржува и Молдавија, која е во блок со Украина во пристапните разговори. Овој чекор би го олеснил патот за интеграција во ЕУ и на Северна Македонија, која од 2020 е истотака блокирана од ветото на Бугарија.
„Проширувањето е важен приоритет за претседателот на Европскиот совет. Тој го гледа како најзначајна геополитичка инвестиција што ЕУ може да ја направи,“ изјави еден од официјалните претставници.
Според дипломатите, Коста интензивно лобирал кај лидерите за време на неговата неодамнешна „турнеја низ престолнините“ и на маргините на Генералното собрание на ОН во Њујорк.
Еврокомесарката за проширување Марта Кос во понеделник пристигна во Киев, каде што Украина го завршува процесот на усогласување на законодавството. „Украина испорача. Сега е редот на земјите-членки да го дадат зелено светло,“ изјави таа за POLITICO, додавајќи дека не смее да се дозволи реформскиот моментум да забави.