Британска државјанка пријавила дека била сексуално нападната од страна на оператор на водени спортови во Тунис за време на лет со параглајдер, дел од организирани туристички активности за нејзината семејна група.
52-годишната жена од Саутпорт, Англија, била на одмор во Тунис преку туристички пакет од компанијата easyJet, заедно со нејзината 17-годишна ќерка, нејзините 16-годишни синови-близначи и пријателка на ќерката.
Според изјавата дадена за британските медиуми, таа планирала да лета во тандем со пријателка, но поради ветровити услови им било кажано дека секоја ќе мора да лета сама, со придружба на по еден инструктор.
Жената изјавила дека нејзината пријателка имала позитивно искуство, но нејзиниот лет бил трауматичен. Таа тврди дека инструкторот ја допирал непристојно додека биле во воздух, вклучувајќи и повлекување на нејзиниот костим за капење и физичко притискање.
„Се чувствував злоупотребено и немоќно. Тоа беше застрашувачко искуство“, изјавила таа, додавајќи дека се обратила до менаџерот на спортскиот центар веднаш по слетувањето и подоцна го пријавила случајот во локалната полициска станица.
Туристката истакна дека инцидентот целосно ѝ го уништил одморот и дека, според неа, не станува збор за обичен флерт туку за сериозен сексуален напад.
Таа верува дека осомничениот е уапсен, а случајот сега го водат нејзината осигурителна компанија и британското Министерство за надворешни работи.
Портпарол на easyJet изјави: „Безбедноста и благосостојбата на нашите клиенти е приоритет. Во координација сме со нашиот партнер-хотел за да го испитаме случајот.“