Неколку судови во Северна Македонија немаат уредна евиденција за недвижен имот, депозитни сметки и одземени предмети, а бројот на нерешени предмети продолжува да расте, покажува годишниот извештај на Државниот завод за ревизија за 2024 година.
Ревизијата опфати пет судови, и тоа: Основен граѓански суд Скопје, Основен кривичен суд Скопје, Основен суд Гостивар, Основен суд Прилеп и Апелационен суд Гостивар. Во 2023 година тие оствариле приходи од 1,08 милијарди денари и расходи од 733,4 милиони денари. Од вкупно 28 ревизорски мислења, 10 се без резерва, 12 со резерва, а шест се неповолни.
Ревизорите утврдиле:
-
Недостиг на веродостојна документација за имот и непотврдена сопственост на објекти, вклучително и во Основен суд Гостивар, каде не е доставена документација за правото на сопственост или користење на објектот, и во Апелационен суд Гостивар, каде нема уредна сметководствена евиденција за деловните простории.
-
Во делот на депозитните сметки, освен во Основен граѓански суд Скопје и Апелационен суд Гостивар, не се преземени активности за попис и усогласување на состојбата на средствата со евиденцијата.
-
Основен кривичен суд Скопје не изготвил извештај за спроведениот попис, додека во Основен и Апелационен суд Гостивар извештаите се некомплетни.
-
Невоспоставена евиденција за одземени пари, скапоцености и други предмети, како и неспроведен или делумно спроведен надзор врз финансиското и материјалното работење.
Во 2023 година, сите ревидирани судови освен Апелационен суд Гостивар се јавувале како тужена страна во предмети со вкупна вредност на тужбени барања од 17,2 милиони денари. Истовремено, Основен граѓански и Основен кривичен суд Скопје водат постапка како тужители за нанесена штета на објекти и насилство врз лица, со пресуди против солидарни должници во вкупен износ од 1,74 милиони денари.
Извештајот нотира и проблеми со недостиг на кадар во судската полиција. Иако во актите за систематизација постојат предвидени работни места, многу се непополнети – во Апелационен суд Гостивар ниедно. Недоволниот број полицајци предизвикува потреба од прекувремена работа, при што е надминат законскиот лимит од 190 часа годишно, што е спротивно на член 117 од Законот за работни односи.
ДЗР препорачува итно подобрување на сметководствените евиденции, редовен попис на имотот и депозитите, пополнување на кадарот во судската полиција и засилена внатрешна контрола за да се спречи натамошно зголемување на нерешените предмети.