Сојузот на стопански комори на Македонија (ССК) разреши двајца потпретседатели, Горан Ѓорѓиевски и Ромео Костадиновски, кои истовремено се исклучени и од членството, објави денеска Сојузот.
Во официјалното соопштение, потпишано од претседателот Трајан Ангелоски, не се наведени конкретни причини за одлуката.
Ѓорѓиевски, кој е претседател на Агро-бизнис комората, изјави за медиумите дека соопштението е потпишано од нелегитимен претседател и дека на вонредно собрание на Сојузот му биле одземени сите ингеренции на Ангелоски.
Превирањата во Сојузот следуваат по изречената казна од Комисијата за заштита на конкуренцијата за картелско здружување, која предизвика јавни реакции и поделби во раководството.
На 9 јули се одржа вонредно собрание на ССК по барање на 10 членови на Управниот одбор. На собранието, кое го водеше извршната директорка Сузана Јаневска, беа констатирани „груби прекршувања на Статутот“, злоупотреба на овластувања и штетни објави на социјалните мрежи од страна на претседателот Ангелоски и неговото опкружување.
Беше одземена претседателската функција на Ангелоски, но тој и натаму важи за легитимен претставник од својот дел од Управниот одбор, кој ги исклучува членовите што учествувале на вонредното собрание, кое тој го смета за нелегитимно.
Сојузот брои седум потпретседатели, 35 стопански комори и повеќе од 30 здруженија и асоцијации.
До сега нема информации дали е одржано ново вонредно собрание за избор на легитимен претседател, кое беше закажано за 30 јули.
ССК ја потенцира својата посветеност кон транспарентно и одговорно работење во интерес на стопанството и економскиот развој.