Форум за разумни политики (ФРП) денеска ја презентираше првата верзија на Индексот за политички интегритет (ИПИ), национален инструмент наменет за мерење, промоција и поттикнување на културата на интегритет во политичкиот и јавниот живот.
Настанот, одржан во Клубот на пратеници, го следеа претставници на институции, медиуми и граѓански организации.
Во воведното обраќање, Гордан Георгиев од ФРП дека ИПИ е создаден во контекст на намалена доверба на граѓаните во институциите и политичките актери. „Податоците го потврдуваат она што сите го чувствуваме: јавниот дискурс често е обременет со нетранспарентност, негативна реторика и недоволна отчетност. Индексот не служи за казнување, туку за поттикнување доблест, учење и партнерство,“ рече Георгиев.
Наодите од теренското истражување на јавното мислење ги презентираа Светлана Сиљјаноска, консултантка за стратешки комуникации, и Елена Огненовска од Тим Институт. Резултатите покажаа дека граѓаните сметаат дека политичката релевантност треба да се мери и преку интегритет, не само преку политичка моќ. Истражувањето укажа на потребата од поголема отчетност, етичко однесување и институционални практики кои ја градат довербата кај јавноста.
Во вториот дел од настанот беше претставена методологијата на ИПИ. Георгиев и Сиљјаноска објаснија дека индексот има четири клучни цели:
-
нормализирање на интегритетот како мерило за политичка релевантност;
-
јакнење на видливоста и признанието за етичко и чесно однесување;
-
отворање можности за корекција и унапредување на институционалните практики;
-
поттикнување дијалог заснован на вредности.
ИПИ е замислен како општествен ресурс чија кредибилност зависи од учеството на сите засегнати страни – институции, независни тела, академската заедница, медиуми и граѓанскиот сектор. На настанот беше истакнато дека Форумот веќе упатил писмо на намера до клучните чинители за воспоставување партнерство во заедничка имплементација и институционализација на ИПИ.
Со презентирањето на ИПИ започнува поширок општествен процес за градење нов јавен стандард, во кој политичкиот интегритет не е исклучок, туку норма.
