Премиерот Христијан Мицкоски денеска најави дека Владата ќе изгради интегриран систем за препознавање, анализа и одговор на хибридните и информациските закани, нагласувајќи дека тие претставуваат еден од најкритичните безбедносни предизвици на современото време.
„Нашиот национален интерес е јасен: да изградиме држава која координирано, брзо и професионално реагира на манипулации и дезинформации“, рече Мицкоски на конференцијата „Хибридни и информациски закани: од препознавање кон национален системски одговор“, организирана од Институтот за комуникациски студии.
Премиерот додаде дека целта е создавање општество и институции кои можат да препознаат лажни вести и манипулации, со брз и стратешки одговор, истакнувајќи дека дезинформациските кампањи се и медиумски и безбедносен проблем со стратешки последици.
На конференцијата присуствуваат и странски дипломати и домашни експерти, а Мицкоски порача дека хибридните закани треба да станат главен приоритет во реформите за национална безбедност.