Потпаролот на партијата ЗНАМ и директор на ПИОМ, Никола Мемов, упати остри критики кон коалицијата Вреди, обвинувајќи ја дека не го поддржала кандидатот на ВМРО-ДПМНЕ, Орце Ѓорѓиевски, во вториот круг од локалните избори во Скопје.
„Чесно ве поддржавме, а вие не изигравте“, напиша Мемов на својот профил на Фејсбук, додавајќи дека ЗНАМ платила „огромна цена“ за својата поддршка на Вреди во претходните изборни договори.
Постот доаѓа по првите резултати од гласањето во Скопје, каде што кандидатот на ВМРО-ДПМНЕ не успеа да обезбеди доволна поддршка за победа. Мемов тврди дека токму изостанатата поддршка од Вреди го нарушила исходот.
Од коалицијата Вреди засега нема официјален одговор на обвинувањата.
ЗНАМ, партија што по последните парламентарни избори склучи коалиција со ВМРО-ДПМНЕ, во последно време сè почесто испраќа пораки кои укажуваат на растечко незадоволство во владејачката коалиција.