Јавното претпријатие „Лајка“ соопшти дека викендов добило повеќе пријави за појава на поголеми глутници кучиња без ушни маркици во скопската општина Карпош. Од утринските часови, екипите на претпријатието се на терен за заловување и хуман третман на животните, во согласност со процедурите и стандардите за благосостојба на животните.
Општина Карпош потврди дека бројот на бездомните кучиња во последните денови е зголемен и дека градските екипи се на терен за да ја следат состојбата.
Независната организација „Анима Мунди“ побара итна истрага за организиран транспорт на кучињата, откако дел од нив биле пронајдени со маркици од Албанија. Организацијата предупреди дека нелегалното дислоцирање на животни претставува ризик за јавната безбедност и благосостојбата на животните.
Граѓани објавија фотографии од локации во Карпош, вклучително и паркот спроти трговскиот центар „Сити Мол“, каде се гледа значителен број на кучиња на улица.
Јавното претпријатие и општината апелираат до граѓаните да не пристапуваат кон животните и да ги известуваат надлежните органи.