Мрежата за заштита од дискриминација денеска предупреди дека јавната дебата за примената на законските услови за управување со моторни возила во изминатите денови била проследена со сензационализам, генерализации и говор на омраза, што, според неа, дополнително ги продлабочува општествените поделби.
Во соопштение до јавноста, Мрежата потсети дека законите важат подеднакво за сите граѓани, но и дека институциите имаат обврска да создадат услови законските критериуми да бидат реално и еднакво применливи за сите општествени групи.
„Кога таквите услови не постојат, последиците најчесто ги трпат веќе ранливите заедници, што ја продлабочува недовербата во институциите и правниот систем“, се наведува во реакцијата.
Мрежата оценува дека јавниот дискурс брзо се оддалечил од конкретното прашање за непочитување на сообраќајните прописи и прераснал во поширока стигматизација на ромската заедница, со што се зајакнуваат постојните стереотипи и нееднаквости.
Според Мрежата, структурните проблеми со кои се соочуваат Ромите – ограничен пристап до образование, вработување и основни услуги – и понатаму остануваат нерешени, а репресивната примена на законите без паралелни инклузивни политики може да има непропорционални последици.
Организацијата повика институциите доследно да реагираат на говор на омраза и закани со насилство во јавниот простор и побара внимателен и одмерен тон во јавната комуникација, особено од страна на носителите на јавни функции.
Мрежата ги повика и медиумите да известуваат одговорно, без сензационализам, и да ги отстрануваат коментарите што содржат говор на омраза или повици на насилство, оценувајќи дека јавниот дискурс има директно влијание врз општествената кохезија.