Недостатокот на превенција и безбедносни стандарди ги поврзува пожарите во романскиот клуб „Колектив“ во 2015 година и дискотеката „Пулс“ во Кочани, додека разликите во евакуацијата, здравствениот одговор и институционалната координација ги покажуваат клучните лекции за спасување животи, беше оценето на јавна дебата одржана денеска во Скопје.
На дебатата „Букурешт – Кочани: Научени лекции и пат до заздравување“, романските спасувачи го споделија искуството од трагедијата во која загинаа 64 лица, нагласувајќи дека пиротехниката, преполниот објект и ограничените излези биле клучни фактори за брзото ширење на пожарот.
Раед Арафат, државен секретар во романското Министерство за внатрешни работи, изјави дека пожарот во „Колектив“ се проширил за неколку секунди по активирањето на пиротехниката, при што горела звучната изолација, а единствениот функционален излез бил сериозно тесно грло за евакуација.
„Иако капацитетот бил за 80 лица, во клубот имало околу 400 гости. Тоа директно влијаеше врз бројот на жртвите“, рече Арафат.
Според него, пожарот бил изгаснат за две минути, а итните служби воспоставиле коридор од амбулантни возила за транспорт на повредените. Вкупно 152 лица биле хоспитализирани, од кои 88 биле интубирани.
Арафат посочи дека институциите биле под силен притисок дел од повредените да се лекуваат во странство, додавајќи дека еден пациент починал за време на медицински транспорт.
Романските власти најавија построги законски мерки, вклучително и целосна забрана на пиротехниката во затворени простории и казни до 20.000 евра за надминување на дозволениот капацитет. Учесниците на дебатата ја истакнаа и улогата на европскиот механизам за цивилна заштита како клучен фактор во вакви кризни ситуации.