Агенцијата за храна и ветеринарство (АХВ) најостро реагираше на изјавата на градоначалникот на Општина Крива Паланка, Сашко Митовски, дека локалната самоуправа нема законска надлежност да постапува во справувањето со проблемот со говедата кои неконтролирано се движат низ градот и околните села.
Во писмено соопштение, АХВ наведе дека општината е подеднакво одговорна за решавање на проблемот и го повика градоначалникот да не се иззема од одговорност.
„Говедата ниту се размножија во толку голем број за година и половина, ниту може инстантно да се соберат, во услови кога со Агенцијата не соработува Општината“, се вели во реакцијата.
Жителите на Крива Паланка и на околните села деновиве одржаа протести барајќи итно решавање на, како што велат, 15 години стар проблем со стотици говеда кои предизвикуваат материјална штета врз приватни имоти и земјоделски посеви.
Во меѓувреме, инспектори на АХВ, со асистенција на полицијата, спроведоа акција за прибирање на дел од животните, при што беа регистрирани тензии на теренот.
Од АХВ соопштија дека мерките ќе продолжат во координација со надлежните институции, со цел трајно решавање на проблемот.