Европратеници повикаа на итни чекори за да се спречи учеството на Русија на Венециското биенале, предупредувајќи дека дозволувањето на руски павилјон би ја поткопало довербата во Европската унија.
Во писмо испратено до претседателката на Европската комисија, шефот на европската дипломатија и други високи претставници, пратениците ја осудија одлуката на организаторите да ѝ дозволат на Русија повторно да учествува, во услови кога војната во Украина продолжува.
„Под никакви околности Русија, како држава под обемни санкции на ЕУ, не треба да учествува на настан финансиран со европски средства“, се наведува во писмото.
Пратениците предупредија дека отворањето на рускиот павилјон би ѝ дало легитимитет и престиж на земја која, според нив, ги изгубила поради своите постапки во Украина.
Украинското Министерство за надворешни работи ја поддржа иницијативата, оценувајќи дека Русија ги отфрла сите предлози за завршување на војната и дијалогот што го промовираат организаторите на изложбата.
„Не станува збор за забрана на културата, туку за недоследноста на организаторите“, изјави портпарол на украинската дипломатија, додавајќи дека продолжувањето на нападите врз украинското културно наследство го прави учеството на Русија „неморално“.
Украина наведува дека од почетокот на војната се уништени или оштетени илјадници културни објекти, додека стотици уметници загинале.
Пратениците, исто така, побараа суспензија на европското финансирање за биеналето доколку Русија не биде отстранета од листата на учесници, како и воведување рестриктивни мерки против лица и организации поврзани со рускиот павилјон.
Одлуката на организаторите предизвика силни реакции низ Европа. Европската комисија веќе ја критикуваше, предупредувајќи дека може да биде доведено во прашање финансирањето на настанот.
Во исто време, министри за култура и надворешни работи од 22 европски земји побараа Русија да биде исклучена, додека италијанската влада соопшти дека одлуката е донесена независно од организаторите.
Организаторите на биеналето претходно изјавија дека настанот е „отворена платформа“ која се спротивставува на цензурата во културата и уметноста.
Венециското биенале, еден од најголемите уметнички настани во светот, ќе се одржи од 9 мај до 22 ноември 2026 година.