Повеќе од една третина од потрошувачите во Европската унија се соочиле со проблеми при онлајн купување, додека во Северна Македонија слични потешкотии пријавиле околу 30% од купувачите, покажува истражување на Евростат за 2025 година за користењето на информатичко-комуникациските технологии во домаќинствата.
Според податоците, 35,4% од онлајн купувачите во ЕУ пријавиле проблеми при купување преку интернет-страници или мобилни апликации.
Во Северна Македонија, уделот на корисници кои се соочиле со проблеми при онлајн купување изнесува околу 30%.
Најчестите проблеми се поврзани со доцнење на испораките, пратки што не пристигнуваат, како и производи кои не одговараат на описот или очекувањата на купувачите.
Податоците покажуваат дека електронската трговија продолжува да расте во Европа и во регионот, но прашањата поврзани со доверливоста на услугите и заштитата на потрошувачите остануваат предизвик за значителен дел од корисниците.