Полициските службеници во изминатото деноноќие привеле 13 возачи низ целата држава поради опасно и безобѕирно управување со моторни возила, а шест автомобили се одземени, соопшти Министерството за внатрешни работи (МВР).
Според информации од полицијата, меѓу приведените се и возачи под дејство на алкохол, лица без возачка дозвола и таксисти кои ја прекршиле сообраќајната регулатива во Скопје.
Во Гостивар, двајца млади возачи биле приведени поради управување возило без возачка дозвола, а пет други лица од Тетовско и Гостиварско биле лишени од слобода по слични прекршоци.
Во Кичево, двајца возачи кои претходно имале забрана за управување со моторно возило биле запрени и приведени, а нивните возила одземени.
МВР соопшти дека засилените сообраќајни контроли продолжуваат низ целата земја, со цел да се спречат сообраќајни незгоди и да се обезбеди поголема безбедност на патиштата.