Годишната инфлација во еврозоната се зголеми на 1,9% во февруари 2026 година, од 1,7% во јануари, покажуваат податоците објавени од Eurostat.
На ниво на Европската унија, инфлацијата достигна 2,1% во февруари, во однос на 2,0% претходниот месец. Една година претходно, стапката изнесуваше 2,3% во еврозоната и 2,7% во ЕУ.
Најниски годишни стапки на инфлација се регистрирани во Данска (0,5%), Кипар (0,9%) и Чешка (1,0%). Највисоки стапки има во Романија (8,3%), Словачка (4,0%) и Хрватска (3,9%).
Во споредба со јануари 2026 година, инфлацијата опаднала во 11 земји членки, останала непроменета во четири, а се зголемила во 12.
Податоците покажуваат дека услугите имаат најголем придонес во вкупната инфлација во еврозоната во февруари, со 1,54 процентни поени, следени од храната, алкохолот и тутунот со 0,48 поени, како и неенергетските индустриски производи со 0,17 поени. Енергетскиот сектор, пак, имал негативен придонес од -0,30 поени.
На месечно ниво, инфлацијата во еврозоната изнесуваше 0,6% во февруари.
Според Eurostat, индексот на потрошувачките цени (HICP) од февруари се пресметува според ажурирана методологија, усогласена со меѓународната класификација на ОН (COICOP 2018), при што како нова категорија се вклучени и игрите на среќа во рамки на услугите за рекреација. Референтниот период на индексот е ажуриран на 2025=100.
Еврозоната од јануари 2026 година е проширена на 21 земја, по приклучувањето на Бугарија.