Цената на дизелот од полноќ ќе се зголеми за 2,5 денари по литар и ќе изнесува 98 денари, соопшти Регулаторната комисија за енергетика, додека бензинот Еуросупер БС-95 ќе поевтини за половина денар, на 83,5 денари за литар.
Цената на Еуросупер БС-98 останува непроменета на 85,5 денари за литар.
Од Регулаторната комисија соопштија дека во новата одлука се вклучени повластената стапка на ДДВ од 10% и намалените акцизи за горивата – 4 денари по литар за дизелските и 2 денари по литар за бензинските фракции.
Според Комисијата, без продолжување на намаленото ДДВ и без интервенција во акцизата, цената на бензините би била повисока за 8,5 денари, а на дизелот за 12 денари во однос на сегашната одлука.
Со новата одлука, малопродажните цени на нафтените деривати во просек се зголемуваат за 1,41% во однос на одлуката од 30 март.